الحوثيين والمحور عامة. قوة وتأثير الاسلحة اللي معهم . تكون اكبر بكثير .قبل مايطلقوها. من قوتها وتأثيرها بعد اطلاقها.
قبل مايطلقو اي نوع من صواريخهم يجلسو سنه يصفونه ويصفو قوة تأثير
مثلا يصفو صاروخ
يقول. لك الصاروخ جحاف 7 لما يتم اطلاقه له قدرة على التخفي يجلس يلوي بين الجبال. ويرتفع في السماء على ارتفاع 2000 متر. ويهبط ويطير على ارتفاع عشره سنتيمتر من الارض.
واذا ماحصل الهدف، يريعي له بالمكان لغاية مايرجع. ولما ينفجر تطلع منه اول حاجه شظايا خاصه بالاوادم لغاية ماتخلص عليهم.. واذا في شظية ماحصلت ادمي تقتله. تلف وترجع لمكانها داخل الصاروخ. وبعدا تخرج الشظايا المتخصصه بالطقومات . لما تخلص شغلها
بعدين الصاروخ يشل نفسه يصور الضحايا
ويرسل الصور لنصر الدين عامر
وبعدين يجي يوم واطلقوا الصاروخ جحاف 7 وطار الى فوق مفرق الجوف وسقط وانفقع وخرجت منه غطيان قوطيات وديسميسات مكسره وفحم ورماد.. لو كان ما اطلقوه كان احسن كانت الناس خايفه منه. لكن بعد ما انطلق وانفقع خلاص قضيتو على مستقبله
عملو بنص نصيحة الامام..
كان الامام معه مدفع . ويفجع الناس بالمدفع ويوصف تاثيره كما وصف الحوثيين لصاروخ جحاف 7. كان الامام يقول للناس ان رصاصه من المدفع تكفي لمسح جبل من الوجود.. وكان يحكم البلاد بالفجاع بالمدفع
في مره حصل تمرد في اب.. ومعه وحده عسكريه معها هذا المدفع
وجه هذه الوحده بالتحرك الى اب وياخذوا معهم المدفع.. بكرو الصباح وسرحو قدا اب..
بعد يجي ساعه دخل للامام اللي جهز المجموعه مع المدفع وبلغه ان الجماعه سرحو.مع المدفع
قال له الامام. وخذو معهم ذخائر المدفع
قال له اكيد والا يسرحو مدفع بلاذخيره اتطمن كل شي تمام
الامام قفز من مكانه. قال له يالله جري بعدهم ورجع الذخاير. اقطب .
سرح جري بعد الجماعه. لحقهم في معبر
اخذ الذخاير وجري بها لاعند الامام
وسلمها الامام.
وقال للامام ذلحين قل لي وش فايدة المدفع بلا ذخيره
قال له فايدته بلا ذخيره اكبر من فائدته مع الذخيره.. الناس ذلحين مفجوعين من المدفع لما ماقد شافوه قرح
لو قرحنا به عليهم .بايشوفو ان قذيفته العوافي وماعد بايفتجعو..
كيف
بايشوفو غطيان القواطي والديسميسات المكسره..